Аввал хабар берганимиздек, Ўзбекистон Республикаси Фанлар Академияси Навоий бўлими олимлари ўз илмий ишланмаларини тижоратлаштиришга қаратилган янгича ёндашувни ишлаб чиқдилар. Хусусан, бентонит қўлланадиган қишлоқ хўжалиги соҳасида Бўлим олимлари томонидан ишлаб чиқилган инновацион технологиялардан фойдаланган ҳолда суғорилмайдиган лалми ерларда буғдой етиштиришни ташкил этиш бўйича ташаббускор гуруҳ тузилди. Ма'лумки, бентонитнинг сорбсион хоссалари, я'ни намликни ўзига сингдириш ва ушлаб туриш қобилияти уруғларнинг стресссиз униб чиқишини ва уларнинг барқарор ўсишини та'минлайди, ўсимликларнинг сувга бўлган эҳтиёжини қоплайди.
Бўлимнинг илмий ходимлари ташаббускор гуруҳга шахсий маблағлари билан улуш асосида кирдилар. Жорий йил феврал ойининг иккинчи ярмида улар тегишли соҳа таянч докторантлари билан биргаликда Бўлим қошида ташкил этилган “Қизилқум” илмий-тадқиқот тажриба стансиясига Нурота туманида ажратилган 56 гектар лалми ерларида буғдой экиш бўйича ишларни амалга оширдилар. Бундан ташқари, ушбу ишларда ўзлари ишлаб чиққан препаратларни синаб кўриш учун Фанлар Академиясининг Умумий ва ноорганик кимё институтининг иккита мутахассиси (ўсимлик ўсиш стимуляторлари АА-01 ва АА03) ва Микробиология институтидан бир вакил (комплекс биопрепарати) иштирок этдилар.
Шундай қилиб, Фанлар Академияси Генетика ва ўсимликлар экспериментал биологияси институти олимлари томонидан яратилган лалми шароитларда ўсиши мумкин бўлган юмшоқ буғдойларнинг иккита янги “Э'зоз” ва “Қайроқтош” навлари 6 гектар ерга экилди. Шунингдек, қолган 50 гектар ерга “Сурхак” буғдой нави экилди.
Экиш учун майдон бир нечта участкаларга бўлинди. Унда уч хил бўғдой юқорида айтиб ўтилган препаратларни фақат ўзларини ҳамда Бўлим томонидан ишлаб чиқилган сув тежамкор инновацион технология, я'ни бўғдой уруғларини бентонит гили кукуни билан қобиқлаб экиш усули билан бирга қўллаган ҳолда экилди. Келажакда ўсимликларни баргидан бентонит суспензиясида эритилган ўғитлар билан озиқлантириш усулларини қўллаш ҳам кўзда тутилган. Бир участка назорат учун қолдирилди. Шунингдек, илмий кузатувлар учун мунтазам равишда навбатчилик ташкил этилди ва дала шийпони сифатида фойдаланиш учун вагончик олиб келиниб, жиҳозланди.
Кейинчалик, тайёр маҳсулотни сотишдан олинган фойда иштирокчиларнинг улушига қараб тақсимланади. Йиғилган буғдойнинг бир қисми эса Навоий бўлимининг уруғчилик фондига ўтказилади.
ФА Навоий бўлими матбуот хизмати.